माय अहमदनगर वेब टीम
अहमदनगर - राज्यातील महाविकास आघाडीच्या सरकारने नगर महापालिकेतील भाजपच्या सत्तेसमोर अडचणी उभ्या केल्या आहेत. नगर विकास विभागामार्फत विविध विकास कामांसाठी वितरित करण्यात येणाऱ्या निधीला स्थगिती दिली असल्याने मनपाचा कोट्यवधीचा मंजूर असलेला विकास निधी रखडण्याची चिन्हे आहेत. दरम्यान, नगर विकास विभागातून मंजूर असलेल्या निधीतील कोणतेही विकास काम 'वर्कऑर्डर' स्थितीत नाही, असे मनपाने सरकारला कळविले असल्याचे समजते.
शिवसेना-राष्ट्रवादी व काँग्रेसच्या महाविकास आघाडीने गुरुवारी रात्री तातडीचा आदेश जारी करून नगर विकास विभागामार्फत राज्यातील सर्वच स्थानिक स्वराज्य संस्थांतील विकासकामांना वितरित केलेल्या निधीला स्थगिती दिली आहे. अशा कामांची यादीही तातडीने मागविली आहे. यात महापालिकांना पायाभूत सुविधा अनुदान, मनपा हद्दवाढ अनुदान, नवीन नगरपालिका अनुदान, नगरपालिका हद्दवाढ, नगर परिषद यात्रास्थळ, नगरपरिषद वैशिष्ट्यपूर्ण योजना, नवीन नगर पंचायत, मनपा ठोक तरतूद, नगरपरिषद ठोक तरतूद, रस्ता अनुदान, मनपा नगरोत्थान, नगरपालिका नगरोत्थान अशा विविध योजनांसाठी मागील २०१९-२० या आर्थिक वर्षासाठी वितरित करण्यात आलेल्या निधीबाबत सविस्तर माहिती सरकारने मागविली आहे. तोपर्यंत या निधीतील खर्चाला स्थगिती दिली आहे. यामुळे मात्र नगर मनपातील भाजप सत्तेची अडचण झाली आहे.
कोट्यवधी रखडणार
मनपात भाजपची सत्ता आल्यावर त्यावेळी सत्तारुढ असलेल्या राज्यातील भाजप सरकारने १०० कोटींचा विशेष विकास निधी मंजूर केला आहे. या निधीतून घ्यावयाच्या कामांसाठी मनपाने प्रकल्प सल्लागार समितीही आपल्या खर्चातून नेमली आहे व तिला प्रस्तावित असलेल्या विविध विकास कामांची अंदाजपत्रके तयार करण्याचेही काम दिले आहे. पण हा निधी आता दोलायमान झाला आहे. याशिवाय महापौर बाबासाहेब वाकळे यांनी त्यांच्या प्रभाग सहासाठी तसेच त्याशेजारील प्रभाग पाचसाठी प्रत्येकी ५ कोटीचा विकास निधी मंजूर करून आणला होता. पण त्याचे प्रस्तावच अद्याप मंजूर नाहीत. नगरोत्थान अंतर्गत ७५ लाखाचे रस्ता अनुदान मंजूर असले तरी त्याचेही कार्यारंभ आदेश दिले नसल्याने ही प्रक्रिया व कामेही थांबवावी लागणार आहेत. दरम्यान, मागील वर्षी अपक्ष नगरसेवक श्रीपाद छिंदम यांनी भाजपचा उपमहापौर असतानाच्या काळात आणलेल्या १० कोटीच्या निधीतून होत असलेले सिद्धीबाग-नीलक्रांती चौक रस्ता सिमेंट काँक्रिटीकरण काम सुरू असल्याने ते वगळता अन्य प्रस्तावित असलेली रस्ता कामे वर्कऑर्डर देऊनही सुरू झाली नसल्यास तीही अडचणीत येण्याची शक्यता असल्याचे सांगण्यात आले
Post a Comment